బంగాళాఖాతంలో మరో అల్పపీడనం.. ఏపీకి వర్ష సూచన!

LIVE9 NEWS – విశాఖపట్నం 10th Nov 2026

విశాఖపట్నం: బంగాళాఖాతంలో మరో అల్పపీడనం ఏర్పడే అవకాశం ఉందని భారత వాతావరణ శాఖ తాజా అంచనాల్లో వెల్లడించింది. నవంబర్ 13వ తేదీ ప్రాంతంలో ఆగ్నేయ బంగాళాఖాతంలో అల్పపీడనం ఏర్పడే సూచనలు ఉన్నట్లు వాతావరణ శాఖ పేర్కొంది.ఈ వాతావరణ వ్యవస్థ వాయవ్య దిశగా కదులుతూ, ఏర్పడిన తర్వాత 24 గంటల్లో మరింత బలపడే అవకాశం ఉందని అంచనా వేస్తున్నారు.ఈ ప్రభావంతో నవంబర్ 14 నుంచి 16వ తేదీ వరకు కోస్తాంధ్ర, యానాం, రాయలసీమ ప్రాంతాల్లో అక్కడక్కడా వర్షాలు కురిసే అవకాశం ఉందని వాతావరణ శాఖ అంచనా వేసింది.

మరోవైపు తమిళనాడు, పుదుచ్చేరి ప్రాంతాల్లో కొన్ని రోజుల్లో భారీ వర్షాలు కురిసే అవకాశం ఉందని కూడా వాతావరణ శాఖ వెల్లడించింది.అయితే ప్రస్తుతం అల్పపీడనం ఏర్పడకముందే దాని తీవ్రత, కదలికలు, వర్షపాతం ప్రభావంపై స్పష్టమైన అంచనా వేయడం సాధ్యం కాదని అధికారులు సూచిస్తున్నారు. తదుపరి వాతావరణ బులెటిన్లను బట్టి పరిస్థితుల్లో మార్పులు ఉండవచ్చు.ప్రజలు వాతావరణ శాఖ తాజా సూచనలు గమనిస్తూ అప్రమత్తంగా ఉండాలని సూచించబడుతున్నారు.

LIVE9 NEWS – మన సమాజం.. మన బాధ్యత..